Hildur Björnsdóttir, borgarfulltrúi Sjálfstæðisflokksins, eignaðist sitt fjórða barn á laugardaginn þegar dóttir hennar og Jóns Skaftasonar kom í heiminn. Stúlkan var 17 merkur og 55 cm þegar hún fæddist.
Í viðtali við Morgunblaðið í vor sagði Hildur frá því að ómögulegt væri að skipuleggja lífið langt fram í tímann.
„Ég hefði sannarlega ekki getað ímyndað mér þessar breytingar. Ég hef lært það á síðustu árum að það er ómögulegt að skipuleggja lífið mörg ár fram í tímann, enda líf okkar hjóna þess eðlis að við fáum reglulega mjög óvænt, stór en skemmtileg verkefni í fangið. Þannig er bara okkar líf og verður eflaust alltaf. Síðustu páskar voru einungis örfáum vikum fyrir borgarstjórnarkosningar, og því erfitt að taka mikið frí. Ég ætla því að njóta þessara páska alveg sérstaklega vel, en að loknum páskum þarf ég að fara að huga almennilega að komu dóttur okkar, en það þarf nú víst að skipuleggja ýmislegt þegar fjölgar í fjölskyldunni.“