Fjölskyldan | mbl | 13.8.2023 | 13:25 | Uppfært 14:48

Prinsinn kominn með kærustu

Kristján, prins í Danmörku, verður brátt átján ára. Ljósmynd/kongehuset.dk

Kristján prins af Danmörku er sagður vera kominn með kærustu. Um er að ræða ítalska prinsessu sem heitir Maria Chiara af Bourbon-ætt hinna tveggja Sikileyja. Hún ber einnig titlana hertogynja af Noto og hertogynja af Capri. Þetta kemur fram í umfjöllun Daily Mail.

Prinsessan er dugleg á samfélagsmiðlum og er með marga fylgjendur. Þar birtir hún myndir af sér að spóka sig á Ítalíu við glæstar aðstæður og oftar en ekki er systir hennar með í för en þær eru afar nánar og líkar í útliti.

Foreldrar hennar eru Carlo prins og Camilla prinsessa, hertogi og hertogynja af Castro. Camilla prinsessa er dóttir ítalska milljarðamæringsins Camillo Crociani og ítalskrar leikkonu Edy Vessel. Þar sem fjölskyldan gegnir engum opinberum konunglegum skyldum þá verja þau tíma sínum í að sinna góðgerðastörfum og koma suður Ítalíu á framfæri.

Þá eru Carlo og Camilla nánir vinir Friðriks krónprins og Mary prinsessu og er talið að Kristján prins hafi hitt prinsessuna í veislu í Monte Carlo í sumar. Prinsinn heldur upp á 18 ára afmælið sitt í október og margir bíða spenntir eftir að sjá hvort kærustunni verði boðið í veisluna.

Það kippir í kynið en Friðrik krónprins leitaði utan landssteinana til þess að finna sér eiginkonuefni en Mary prinsessa er frá Ástralíu. Sama á við Jóakim prins en Marie kona hans er frönsk. Auk þess var fyrrverandi kona Jóakims, Alexandra, fædd í Hong Kong.