Frændsystkin Vilhjálms prins sýna honum mikinn stuðning á erfiðum tímum á meðan Katrín prinsessa eiginkona hans og Karl kóngur faðir hans fara í gegnum erfiðar lyfjameðferðir.

Frændsystkinin mættu öll á dögunum í konunglega garðveislu í Buckinghamhöll og sýndu sínar bestu hliðar. Þar voru dætur Andrésar prins, Beatrice og Eugenie og börn Önnu prinsessu, Zara Tindall og Peter Phillips. Öll starfa þau utan bresku krúnunnar, með eigin starfsframa en mæta þó á stærstu viðburðina til þess að leggja hönd á plóg. Einnig starfa þau að góðgerðamálum eftir bestu getu.

Það rigndi mikið og Vilhjálmur gantaðist með að þetta væri fullkomið veður fyrir sund. Þá upplýsti hann um að Georg sonur hans hefði mikinn áhuga á flugvélum og hefði áhuga á að verða flugmaður en bæði Vilhjálmur og Harry þóttu góðir flugmenn á sínum tíma. 

Garðveislurnar eru árlegur viðburður og gestir eru um 8 þúsund talsins. Í ár var komið að Vilhjálmi að vera aðalgestgjafi veislunnar.