"Hver er frægasti Íslendingur allra tíma?" spyr Ágúst Einarsson, fyrrverandi alþingismaður, á vefsíðu sinni. "Þetta er ekki auðveld spurning. Ýmsir myndu segja Leifur Eiríksson en þegar Bandaríkjamenn voru spurðir í skoðanakönnun hver hann væri sögðu flestir að hann væri símafyrirtæki. Sárafáir kannast við Laxness eða vita Íslendingar hvaða egypski rithöfundur hefur fengið Nóbelsverðlaunin? Enn færri kannast við Snorra Sturluson nema Norðmenn. Rétta svarið er Björk. Hún er sá Íslendingur sem flestir í heiminum þekkja."

Gera sér ekki grein fyrir verðmæti Bjarkar

OG ÁFRAM heldur Ágúst: "Íslendingar gera sér enga grein fyrir því hversu verðmæt Björk er landi og þjóð. Hún er ekki aðeins heimsfræg söngkona heldur stundar hún stöðuga landkynningu. Jón Hákon Magnússon, einn fremsti markaðsmaður okkar, segir að Björk sé verðmætasta vörumerki Íslendinga, verðmætara en Icelandic, hið fornfræga merki SH, og verðmætara en Icelandair. Björk er þannig mikilvæg atvinnugrein. Það er mjög vanmetið hvað tónlistin skiptir miklu máli, ekki aðeins sem ein besta leiðin til að láta sér líða vel heldur er hún efnahagslega mikilvæg. Við gleymum oftast hversu miklu peningum menningin skilar inn í þjóðarbúið.

Sígild tónverk samin fyrir 200 árum eru enn að skapa verðmæti og veita fjölda fólks vinnu. Samkvæmt könnun Tónlistarráðs eru 800 tónlistahópar starfandi hérlendis og á hverjum degi eru að meðaltali 4 tónleikar auglýstir einhvers staðar á landinu. Samkvæmt upplýsingum Finns Torfa Stefánssonar tónskálds flutti Ríkisútvarpið á síðustu 9 mánuðum 258 tónleika í 42 erlendum útvarpsstöðvum sem náðu til 37 landa. Þetta ber hróður listamanna okkar víða um heim en skilar líka tekjum.

Opinberir aðilar eiga að styðja við listir ekki aðeins vegna þess að það tilheyrir siðmenntuðu þjóðfélagi heldur einnig vegna þess að það borgar sig. Menning hefur jákvæð áhrif í för með sér sem eykur hagvöxt með óbeinum hætti. Allt tal um að opinberar aðilar eigi ekki að styðja við leikhús, Sinfóníuhljómsveitina og aðrar listgreinar er byggt á vanþekkingu á hagrænu mikilvægi þessara þátta."

Ævintýri gerast enn

LOKS segir Ágúst: "Það þarf að auka listkennslu í grunn- og framhaldsskólum til að almenningur verði meðvitaðri um mikilvægi listar og ungt fólk fái útrás fyrir listsköpun á unga aldri. Við sjáum á dæmi Bjarkar að ævintýrin gerast enn í þessum heimi og vel má vera að fleiri slíkir gimsteinar leynist með íslenskri þjóð."