Rífandi stemning á réttarballi

Það var mikið grín og mikið gaman á réttarballinu sem haldið var í Félagsheimilinu Árnesi í Gnúpverjahreppi á föstudaginn var.

Fyrr um daginn hafði fé verið rekið í Skaftholtsréttirnar í blíðskaparveðri og þá þegar var orðið ljóst að mikil stemning yrði um kvöldið, enda höfðu Paparnir verið pantaðir til þess að sjá um fjörið.

Dansleikurinn sveik heldur engan, ekki frekar en Paparnir síkátu sem héldu mönnum við efnið frá upphafi til enda með vænni blöndu af einkennistónlist sinni, írskættuðum þjóðlögum, og öðrum dansvænum dægurlögum sem allir ballgestir þekktu deili á, jafnt ungir sem aldnir.