Hreimur Örn Heimisson, Birgitta Haukdal, Eivör Pálsdóttir, Rúnar Júlíusson og hljómsveitin Botnleðja eru meðal flytjenda í forkeppni Sjónvarpsins fyrir Söngvakeppni evrópskra sjónvarpsstöðva, en forkeppnin fer fram í beinni útsendingu í Háskólabíói 15. febrúar. Dómnefnd hefur valið 15 lög til flutnings, en 204 lög bárust í forkeppnina.
Leynd hefur hvílt yfir því hverjir flytjendur og höfundar laganna eru, en vegna áhuga kveðst Sjónvarpið hafa ákveðið að upplýsa um nöfn laganna og flytjenda þeirra. Hins vegar verður ekki upplýst hverjir eru höfundar laganna fyrr en í kynningarþáttum forkeppninnar, sem sýndir verða 3. til 7. febrúar.
Úrslitin verða í beinni útsendingu Sjónvarpsins og Rásar 2 15. febrúar í Háskólabíói. Útsendingin hefst kl. 21. Gísli Marteinn Baldursson og Logi Bergmann Eiðsson verða kynnar keppninnar. Ætlunin er að almenningur geti keypt sér miða í Háskólabíói og verður miðaverði stillt í hóf, að sögn RÚV.
Framlag Íslands til Söngvakeppni evrópskra sjónvarpsstöðva 2003 verður valið með símakosningu á lokakvöldinu. Áhorfendur velja lagið með því að hringja í símanúmer þess lags sem þeir telja best. Söngvakeppni evrópskra sjónvarpsstöðva fer fram í Riga í Lettlandi 24. maí nk. og verður fulltrúi Íslands fyrstur á svið ytra.
Flytjendur og lag:
Þóra Gísladóttir - Hvar sem ég enda
Ragnheiður Gröndal - Ferrari
Hreimur Örn Heimisson - Þú
Ingunn Gylfadóttir - Sögur
Rúnar Júlíusson - Ást á skítugum skóm
Birgitta Haukdal - Segðu mér allt
Botnleðja - Eurovísa
Jóhanna Vigdís Arnardóttir - Þú og ég
Regína Ósk Óskarsdóttir og Hjalti Jónsson - Engu þurfum að tapa
Hjördís Elín Lárusdóttir og Guðrún Árný Karlsdóttir - Með þér
Eivör Pálsdóttir - Í nótt
Hreimur Örn Heimisson - Ég á mér lítinn draum
Ragnheiður Eiríksdóttir - Tangó
Höskuldur Örn Lárusson - Allt
Þórey Heiðdal - Sá þig