Bróðir Mette-Marit dæmdur fyrir líkamsárás

Eldri bróðir Mette-Marit, krónprinsessu Noregs, var í dag dæmdur í tveggja mánaða fangelsi fyrir líkamsárás á fyrrum sambýliskonu sína. Maðurinn, sem heitir Espen Høiby og er 44 ára gamall flugmaður hjá SAS, var einnig dæmdur til að greiða konunni jafnvirði um 400 þúsund króna. SAS leysti Høiby frá störfum strax og dómurinn var kveðinn upp en Høiby segist munu áfrýja.

Høiby var fundinn sekur um að hafa ráðist á konuna eftir afmælisveislu í september árið 2001. Konan fékk heilahristing og fingurbrotnaði en Høiby hrinti henni og sló hana síðan ítrekað.

Mál þetta þykir setja ákveðinn blett á norsku konungsfjölskylduna sem lengi vel hefur þótt tákn siðsemdar og háttprýði. Fortíð Mette-Marit var mjög til umfjöllunar áður en hún giftist Hákoni krónprins á síðasta ári en hún var einstæð móðir og viðurkenndi að hafa umgengist fíkniefnaneytendur.

• Blogga um frétt