Muse til landsins í desember?

Sagt var frá því í fréttum Ríkisútvarpsins í gær að trommuleikari rokksveitarinnar Muse hefði lýst því yfir að sveitin væri á leið til Íslands til spilamennsku um miðjan desember.

Samkvæmt fréttinni barði ungur aðdáandi sveitarinnar hér á landi hana augum á dögunum í Kaupmannahöfn. Þar hitti hann meðlimi sveitarinnar eftir tónleikana og ræddi þar við trymbil sveitarinnar, Dominic Howard. Hann lýsti því þá yfir við aðdáandann að þeir myndu koma hingað til lands 15. desember.

Vitað er til þess að nokkrir aðilar hérlendis eru að reyna að fá sveitina hingað til að spila, en síðasta plata þeirra, Absolution, hefur vakið töluverða athygli, fengið góða dóma og selst vel hérlendis. Enginn þessara aðila vill þó bendla sig við þær tilraunir enn sem komið er.

Haft er eftir einum þeirra, sem ekki vildi láta nafns síns getið, að þetta væri allt á samningsstigi eins og staðan er núna en ávinningur af þessu hefði greinilega lekið til þeirra Muse-liða sjálfra.

Jónas Kristinsson, hjá Laugardalshöll, staðfesti að fimmtudagurinn 11. desember hefði verið tekinn frá fyrir rokktónleika.