Jackson hvattur til að gefa sig fram við lögreglu

Stjórnvöld í Santa Barbara í Kalíforníu hafa beðið popptónlistarmanninn Michael Jackson að gefa sig fram við lögreglu og afhenda vegabréf sitt en handtökuskipun hefur verið gefin út á hendur Jackson vegna gruns um að hann hafi framið ítrekuð kynferðisbrot gegn 12 ára gömlum dreng. Talsmaður Jacksons segir að þessar ásakanir séu fáránlegar og algerlega úr lausu lofti gripnar. Talið er að Jackson sé í Las Vegas en hann hefur dvalið þar undanfarið við upptökur á tónlistarmyndbandi.

Fjölmiðlamenn og lögreglumenn fylgdust grannt með flugvellinum í Santa Barbara í gærkvöldi. Ekkert bólaði á Jackson og síðla kvöld sagði Chris Pappas, varðstjóri að engin handtaka hefði farið fram. Fram hefur komið í fréttum, að ef Jackson gefur sig fram muni hann verða færður á lögreglustöð þar sem tekin verða af honum fingraför og ljósmyndir. Hann getur síðan farið frjáls ferða sinna gegn 3 milljóna dala tryggingu.

Um 70 lögreglumenn gerðu húsleit í Neverland búgarðinum, sem Jackson á nálægt Santa Barbara. Húsleitin stóð yfir í 12 tíma. Jim Anderson, lögreglustjóri í Santa Barbara, sagði að viðræður hefðu farið fram við lögmenn Jacksons og söngvaranum hefði verið gefinn kostur á að gefa sig fram innan ákveðins tíma. Sagðist Anderson telja að Jackson yrði samvinnuþýður.

Stuart Backerman, talsmaður Jacksons, gaf út yfirlýsingu í gærkvöldi þar sem segir að Jackson hafi þegar gert ráðstafanir til að snúa heim til Santa Barbara til að svara þeim ásökunum sem á hann væru bornar. „Michael myndi aldrei skaða börn með þessum hætti. Þessar fáránlegu og tilefnislausu ásakanir verða hraktar í réttarsal," sagði Beckerman.

Thomas W. Sneddon Jr., saksóknari, og Anderson, héldu blaðamannafund í Santa Barabar í gærkvöldi og þótti fundurinn nokkuð sérkennilegur á köflum. Saksóknarinn skýrði mál sitt með handapati og velti um hljóðnemum fréttamanna. Þá gerði hann lítið úr vangaveltum fréttamanna vegna þess að húsrannsóknin fór fram sama dag og ný safnplata Jacksons kom út. „Eins og ég og lögreglustjórinn höfum eitthvað gaman af svona tónlist," sagði Sneddon.

Þegar Anderson var spurður um foreldra, sem leyft hafa börnum sínum að sofa í Neverland svaraði lögreglustjórinn: „Ég ráðlegg mönnum að gera það ekki." Sneddon bætti við: „Ekkert af okkar börnum er þar."

Þegar Sneddon bauð blaðamenn velkomna sagði hann: „Ég vona að þið dveljið hér lengi og eyðið miklum peningum því við þurfum á söluskattinum að halda til að reka skrifstofurnar okkar." Hann bætti síðar við að um væri að ræða mjög alvarlegt mál.

Fyrir áratug komu fram ásakanir á hendur Jackson um að hann hefði beitt dreng kynferðisofbeldi. Sneddon rannsakaði einnig það mál en engin ákæra var lögð fram. Jackson, sem neitaði ásökununum, mun hins vegar hafa greitt foreldrum drengsins milljónir dala fyrir að láta málið niður falla og drengurin neitaði í kjölfarið að bera vitni.

Til stóð í gærkvöldi að sýna þátt um tónlistarferil Jacksons á sjónvarpsstöðinni CBS, í tilefni af útgáfu nýju safnplötunnar. Hætt var við að sýna þáttinn og sagði sjónvarpsstöðin í yfirlýsingu, að í ljósi þess hve ásakanirnar á hendur Jackson væru alvarlegar hefði þótt óviðeigandi að sýna þennan þátt.

• Blogga um frétt