Evróvisjónlagið frumflutt í kvöld

Framlag Íslendinga til Söngvakeppni evrópskra sjónvarpsstöðva 2004, lagið Heaven, verður frumflutt ásamt myndbandi í þætti Gísla Marteins Baldurssonar í Ríkissjónvarpinu í kvöld. Jón Jósep Snæbjörnsson, betur þekktur sem Jónsi í hljómsveitinni Í svörtum fötum, syngur lagið og mun hann standa á sviði fyrir Íslands hönd í Istanbúl í Tyrklandi í vor.

Jónsi verður einmitt einn gesta Gísla Marteins í kvöld. Heaven er eftir Svein Rúnar Sigurðsson og textinn eftir Magnús Þór Sigmundsson. Aðrir gestir Gísla Marteins verða Siv Friðleifsdóttir umhverfisráðherra og Björn Jörundur Friðbjörnsson en einnig mun hljómsveitin Dr. Gunni taka lagið.