Stelpubandið Nylon kveður sér hljóðs í dag

Ný­stofnað ís­lenskt stelpu­band, Nylon, skipað fjór­um ung­um söng­kon­um, mun í dag frum­flytja sitt fyrsta lag í út­varps­stöðvum lands­ins. Þær syngja smell­inn "Lög unga fóls­ins" sem upp­haf­lega var flutt­ur af Unun, Heiðu og Dr. Gunna fyr­ir nokkr­um árum.

Söng­kon­urn­ar fjór­ar heita Stein­unn Þóra Camilla Sig­urðardótt­ir, Klara Ósk Elías­dótt­ir, Em­il­ía Björg Óskars­dótt­ir og Alma Guðmunds­dótt­ir. Stelpu­bandið er afrakst­ur söng­prufu á veg­um tón­leika­fyr­ir­tæk­is­ins Concert ehf. sem efnt var til snemma í mars og á annað hundrað stúlk­ur mættu í. Fjór­ar stúlk­ur voru vald­ar úr þeim væna hópi og síðustu vik­ur hafa þær verið við æf­ing­ar, raddþjálf­un og upp­tök­ur, m.a. á mynd­bandi við lagið.

Ein­ar Bárðar­son hjá Concert hef­ur yf­ir­um­sjón með verk­efn­inu. Seg­ir hann að fyrsta uppá­kom­an sé áformuð seinni hlut­ann í maí og breiðskífu með Nylon sé að vænta í haust, þar sem bæði verða lög eft­ir er­lenda höf­unda en einnig nýtt efni eft­ir ís­lenska höf­unda.

Em­il­ía Björg Óskars­dótt­ir syng­ur með band­inu en fór þó ekki í áheyrn­ar­prófið. "Ég var að leika í söng­leik með FB sem heit­ir Lifi rokkið. Ein­ar sá eina æf­ing­una og spurði eft­ir það hvort ég vildi vera með, þannig að þetta var mjög óvænt."

Hún þver­tek­ur fyr­ir það að stúlk­urn­ar séu eitt­hvað í ætt við hinar frægu Krydd­stúlk­ur sem gerðu allt vit­laust í heim­in­um hér um árið. "Nei, alls ekki. Við erum ekk­ert endi­lega að stíla inn á ung­linga­markaðinn og syngj­um alls ekki bara létt FM-popp. Við tök­um allt sam­an, pönk, rokk og ró­leg lög og stíl­um bæði á full­orðna og hina yngri."

Hún seg­ir að vinn­an hafi verið mjög skemmti­leg en líka nokkuð stremb­in. Þær hafi kynnst fullt af nýju fólki og lært heil­mikið.

"Svo erum við fjór­ar orðnar bestu vin­kon­ur, eig­in­lega bara eins og syst­ur, eins væmið og það hljóm­ar," seg­ir hún. Hún bæt­ir við að þær séu samt all­ar mjög ólík­ar. "Klara er senni­lega mesti orku­bolt­inn, þótt við séum all­ar svo­litl­ir orku­bolt­ar. Ég og Alma erum svo aðeins ró­legri. Stein­unn er mamm­an í hópn­um, býður okk­ur hinum í mat og svona," seg­ir hún og hlær.