Hetja á hamfarasvæðum fangelsuð við heimkomu

Ástrali að nafni Thomas Connell er sagður hafa bjargað að minnsta kosti 20 mannslífum er flóðbylgja skall á tælenskri baðströnd á annan dag jóla og þótti því hetja. Í augum áströlsku réttvísinnar telst hann þó áfram skúrkur og situr nú á bak við lás og slá í heimalandi sínu.

Haukfrán augu lögreglumanna hjá lögreglusveitum Queenslandríkis í Ástralíu báru kennsl á Connell er við hann birtist sjónvarpsviðtal sem tekið var á hamfarasvæðunum.

Þar sýndist þeim kominn maðurinn sem þeir hafa verið á eftir um tveggja ára skeið vegna innbrota og líkamsárása. Því höfðu þeir snör handtök er hann sneri aftur til Ástralíu í gær og handtóku hann er hann steig frá borði flugvélar á flugvellinum í Brisbane og færðu hann á bak við lás og slá.

Connell kveðst undrandi á móttökunum og heldur því fram að lögreglan fari mannavillt, rugli saman sér og einhverjum öðrum. Segist hinn nýbakaði „miskunnsami samverji af Patongströnd“ ósáttur við að dúsa nú í klefum með ótíndum bófum.

• Blogga um frétt