Kim Larsen til Íslands

Danski tónlistarmaðurinn Kim Larsen heldur tvenna tónleika á Nasa við Austurvöll 26. og 27. ágúst ásamt hljómveit sinni Kjukken.

Larsen hefur verið einn allra farsælasti dægurlagasöngvari Dana í meira en þrjá áratugi og á þar enn söluhæstu plötu allra tíma, Midt om natten. Eftir að hafa verið lítið áberandi á síðasta áratug hefur hann nú endurheimt fyrri vinsældir og hafa síðustu plötur hans og Kjukken selst í metupplögum í Skandinavíu.

Larsen kom til Íslands 1988 og lék þá á fernum tónleikum á Broadway, sem þá hét Hótel Ísland, við góðar undirtektir.

Miðasala á tónleikana hefst 13. maí en það er fyrirtækið Austur-Þýskaland sem stendur fyrir komu Larsens.