Íslendingar fá tækifæri til þess að taka þátt í Rockstar

Skjáreinn heldur áheyrnapróf fyrir Rockstar í Bandaríkjunum miðvikudaginn 5. apríl næstkomandi á Gauk á Stöng. Ekki er þörf á að skrá sig en áhugasömum er bent á að mæta á Gaukinn klukkan níu um morguninn og láta ljós sitt skína frammi fyrir fulltrúum Mark Burnett productions, að því er segir í tilkynningu.

Keppendur verða að hafa náð 21. árs aldri. Allir mega taka þátt óháð því hvað þeir hafa gert í tónlist áður. Leitað er eftir góðum söngvörum sem telja sig hafa það sem þarf til þess að vera aðalnúmerið í risabandi.

„Keppendur verða að hafa klár þrjú lög til að syngja, eitt af þeim skal vera „cover“ lag. Ekki er víst að allir syngi öll þrjú lögin,“ segir í tilkynningunni.

Þá segir að keppendur geti valið milli þess að syngja án undirleiks (a cappella), með undirspili af disk (playback án lead vocal) eða með einu hljóðfæri sem söngvari eða einhver á hans vegum spilar á.

Í nýrri seríu af Rockstar er leitast við að finna nýjan aðalsöngvara fyrir Supernova, nýja hljómsveit sem er stofnuð af trommaranum Tommy Lee (Mötley Crüe), bassaleikaranum Jason Newstead (Metallica) og gítarleikaranum Gilby Clarke (Guns N´Roses).

Sigurvegarinn mun ásamt öðrum meðlimum Supernova fara í hljóðver og taka upp plötu. Að því loknu verður lagst í heimsreisu.

• Blogga um frétt