Ferðabók Michaels Palins verður skyldulesning í breskum skólum

Ferðabók eftir Michael Palin, fyrrverandi félaga í Monty Python-hópnum, verður gerð að skyldulesningu í landafræði í breskum framhaldsskólum, að því er menntamálaráðherra Bretlands greindi frá í gær. Er þetta liður í tilraunum ríkisstjórnarinnar til að auka áhuga nemenda á landafræði.

Bókin sem um ræðir heitir „Himalaya“ og segir frá sex mánaða ferð Palins um Indland, Pakistan og Kína fyrir um þrem árum. Hann hefur gert sjö heimildakvikmyndir um ferðir sínar, þ.á m. fyrir breska ríkissjónvarpið, BBC.

Ákvörðun menntamálaráðherrans var tekin í kjölfar skýrslu eftirlitsnefndar í menntamálum, en í henni sagði að landafræðikennslu í framhaldsskólum væri verulega ábótavant. Kennarar legðu of mikla áherslu á að kenna nemendum þurrar staðreyndir í stað þess að vekja hjá þeim áhuga á öðrum löndum og menningarheimum.

• Blogga um frétt