Aðþrengdar og of grannar eiginkonur

Breska leikkonan Alex Kingston, sem er vel þekkt úr sjónvarpsþáttaröðinni Bráðavaktinni, segir að hún hafi þótt of þrýstin fyrir hlutverk Lynette Scavo í Aðþrengdum eiginkonum. Felicity Huffman fékk hlutverkið, en Kingston sagði í viðtali við breska dagblaðið Evening Standard að hún hefði ekki fengið hlutverkið vegna þess að hún væri of mikil um sig.

„Ég fékk ekki hlutverkið og ég veit hvers vegna og það hefur ekkert með leikhæfileika að gera, ég er bara allt of stór,” sagði Kingston, sem sakaði leikkonurnar í sjónvarpsþáttaröðinni um að valda konum áhyggjum af þyngd sinni.

„Þær líta ekki út eins og aðþrengdar eiginkonur, þær líta frekar út eins og aðþrengdar ljósmyndafyrirsætur. Þetta gerir mig brjálaða, því þetta ýtir undir sektarkennd kvenna að líta ekki út eins og þær,” sagði Kingston að lokum.

• Blogga um frétt