Hannaði brúðarskó Camillu Parker Bowles

LK Bennet er þekkt nafn í breska tískuheiminum og tengja flestir það við fallega skó og fatnað. Færri vita þó að konan á bak við tískuveldið á ættir að rekja til Íslands. LK stendur fyrir Linda Kristin en millinafnið sækir hún til ömmu sinnar úr Skagafirðinum. Hún heimsækir landið árlega ásamt fjölskyldunni og sækir innblástur til íslenskrar náttúru.

Linda forðast jafnan athygli fjölmiðila og fer sjaldan í viðtöl. Tímarit Morgunblaðsins fékk þó tækifæri til að heimsækja hana í London.

Margar þekktar konur eru á meðal viðskiptavina LK Bennett en ein sú þekktasta er áreiðanlega Camilla Parker Bowles, hertogaynjan af Cornwall. Linda hannaði brúðarskó hertogaynjunnar fyrir brúðkaup hennar og Karls Bretaprins.

„Bæði hertogaynjan og Laura, dóttir hennar, höfðu verið viðskiptavinir LK Bennett árum saman og það gladdi mig mjög að vera beðin um að hanna skó fyrir konunglega brúðkaupið,“ segir Linda m.a. í viðtalinu.

Fyrsta búð LK Bennett var opnuð árið 1990 en í lok þessa árs verða verslanirnar orðnar 50 talsins. Linda var valin Veuve Clicquot-kona ársins í viðskiptum árið 2004 og í fyrra var hún á lista The Sunday Times yfir ríkasta fólk Bretlands.