Allt fór á versta veg

Allt fór á versta veg þegar maður gekk út á hraðbraut í Ástralíu í nærbuxum einum fata í gær. Maðurinn, sem er 18 ára, var manaður í skræfuleik (e. chicken), en leikurinn gengur út á það hvor muni víkja á undan. Í þessu tilviki maður eða bíll.

Maðurinn liggur nú á sjúkrahúsi alvarlega slasaður eftir að jeppi ók hann niður á Tullamarine-hraðbrautinni í Melbourne. Fram kemur í yfirlýsingu frá lögreglunni að hún sé afar undrandi á því að nokkur skyldi láta sér detta slík heimskupör í hug.

Lögreglan segir að það sé lán í óláni að enginn skyldi hafa látið lífið vegna athæfis mannsins. Hún segist eiga bágt með að trúa því að nokkur skuli vera það vitlaus að taka svona mikla áhættu, bæði með sitt eigið líf og samborgara sinna.

Ökumaður og farþegi í jeppanum sluppu ómeiddir. Bifreiðin er hins vegar ónýt.

• 2 blogg um fréttina

Bloggað um fréttina

• Markús frá Djúpalæk: Annar hvor hlýtur að víkja
• Snorri Bergz: Fór allt á versta veg?