Kynlífssenurnar treystu vinaböndin

Blake Lively segir kynlífssenurnar í nýjustu spennumynd Olivers Stone, Savages, hafa treyst vinaböndin milli hennar og mótleikaranna tveggja, Taylors Kitschs og Aarons Johnsons.

Lively er mikilvægur hlekkur í ástarþríhyrningi myndarinnar og birtist hún afar eggjandi í fjölmörgum kynlífssenum. Leikkonan ræddi um Savages og hlutverkið í viðtali á sjónvarpsstöðinni Entertainment Tonight.

„Fyrstu þrír tökudagarnir fóru í að taka upp kynlífssenurnar,“ sagði Lively í bandarísku sjónvarpi. Í myndinni leikur hún unga stúlku sem rænt er af mexíkóskum eiturlyfjahring og dregst inn í hneykslanlegt ástarsamband við þá Kitsch og Johnson.

„Kynlífssenurnar treystu böndin á milli okkar og auðvelduðu eftirleikinn, svo það var mög gott að byrja á þeim,“ sagði leikkonan.

Lively er farsæl leikkona og er ánægð í einkalífinu. Hún á í ástarsambandi við leikarann Ryan Reynolds og hafa þau verið par í sjö mánuði. 

• Blogga um frétt