Elskar Chris Brown af öllu hjarta

Rihanna er greinilega ekki enn komin yfir gamla kærastann, rapparann Chris Brown. Söngkonan sat með tárvot augu í sófanum í spjallþætti Opruh Winfrey á sjónvarpsstöð hennar OWN um helgina og viðurkenndi að hún elskaði Brown enn af öllu hjarta.

Samband Rihönnu og Browns var afar stormasamt og fékk söngkonan dæmt á hann fimm ára nálgunarbann eftir að hann réðst á hana baksviðs á Grammy-verðlaunahátíðinni í Los Angeles árið 2009.

Þau hafa þó alltaf haldið sambandi og sést af og til saman á opinberum vettvangi síðustu misseri, eftir að nálgunarbannið var látið niður falla. Ástarsamband Browns við fyrirsætuna Karrueche Tran virðist þar engu breyta.

Rihanna var gestur Opruh Winfrey um helgina og fékk tár í augun þegar talið barst að Brown. „Ég er ein eins og stendur en við Chris erum ennþá mjög nánir vinir,“ sagði söngstjarnan. 

„Þetta er ekki auðvelt. Ég elska hann af öllu hjarta. Það eina sem skiptir mig máli er að hann sé sáttur við lífið og tilveruna. Ef hann er óhamingjusamur eða einmana er ég ekki heldur sátt.“

• Blogga um frétt