Töluvert hefur borið á því að undanförnu að lögregla sé kölluð að tilefnislausu að heimilum þekktra einstaklinga í Hollywood vegna innbrota eða vár sem ekki reynist fyrir hendi. Var 12 ára drengur ákærður nú nýverið fyrir að hafa staðið fyrir símtali í neyðarlínuna, þar sem lögregla var kölluð að heimili Ashton Kutcher í Los Angeles.
Í símtalinu til neyðarlínunnar í október síðastliðnum var sagt að óprúttnir aðilar hefðu brotist inn á heimili leikarans og væru þar vopnaðir skotvopnum og sprengiefni. Sendi lögregla tafarlaust lið á staðinn þar sem í ljós kom að um hrekk var að ræða.
Í desember handtóku yfirvöld 12 ára dreng sem grunaður var um að hafa staðið fyrir símtalinu segir á vef TMZ. Er sá einnig grunaður um að hafa staðið fyrir öðrum símahrekk þar sem hótað var sprengingu í banka.
Var drengurinn á dögunum ákærður fyrir tvær falsaðar sprengjuhótanir auk þess sem hann er einnig ákærður fyrir að brjótast inn í tölvubúnað. Mun hann þurfa að svara til saka fyrir brotin fyrir unglingadómstól.
Ekkert hefur heyrst frá Kutcher varðandi málið. Hann er þó ekki einn um að hafa orðið fyrir barðinu á slíkjum hrekkjum en einnig má nefna t.d. Justin Bieber, Miley Cyrus, foreldra Kim Kardashian og Simon Cowell, sem öll hafa lent í svipuðu að undanförnu.