Leitin að Langa-Jóni

Þráinn Kolbeinsson, Langa-Jóns unnandi, sendi í dag út neyðarkall á Facebook í leit sinni að hinu týnda bakkelsi Langa-Jóni. Hann og góðvinur hans, Gunnar Nelson, hafa um nokkurt skeið leitað markvisst að bakkelsinu víðfræga, en án árangurs.

„Ég man ekki hvernig þessi leit byrjaði hjá okkur, en okkur langaði einn daginn rosalega mikið í Langa-Jón. Fyrst var leitin ekkert sérstaklega markviss, en eftir því sem á leið fórum við að kíkja inn í öll bakarí sem við sáum. Leitin hefur ekki borið árangur ennþá, og við höfum leitað frekar grimmt í mánuð,“ segir Þráinn.

„Ég hringdi upp í Breiðholtsbakarí um daginn. Þar svaraði virðuleg kona sem vissi alveg hvað Langi-Jón var, en sagði okkur að vélin sem gerði Langa-Jón hefði bilað fyrir ári og ekki enn verið gert við hana og Langi-Jón ekki til hjá þeim síðan. Svo duttum við inn á þráð á bland.is um þetta frá 2010 þar sem menn voru í sömu pælingum. Það eru því greinilega margir að velta þessu fyrir sér.“

Þeir sem vita hvar Langa-Jón er að finna eða hafa einhverjar upplýsingar um hvernig er hægt að nálgast Langa-Jón eru beðnir um að hafa samband á netfangið leitinadlangajoni@gmail.com

Hið horfna bakkelsi Langi-Jón mbl.is

• Blogga um frétt