| mbl | 23.5.2013 | 21:00

Kenna ungu fólki að byggja upp starfsferil

Armina Ilea er framkvæmdastjóri AISEC á Íslandi

Dagana 25. og 26. maí standa alþjóðlegu ungmennasamtökin AISEC fyrir ráðstefnu undir yfirskriftinni „START - AIESEC career design conference“. Á ráðstefnunni koma fram fyrirlesarar sem notið hafa velgengni í viðskiptalífinu og tala um hvernig byggja á upp starfsferil á árangursríkan hátt, leiðtogahæfni, frumkvöðlastarfsemi og fleira.

Framkvæmdastjóri AISEC, Armina Ilea, segir þörfina fyrir sterka stjórnendur á vinnumarkaðinum mikla og telur mikilvægt að hvetja ungt fólk til að nýta sér öll þau tækifæri sem þeim bjóðast.

„Meðal fyrirlesara á ráðstefnunni eru Bala, forstjóri GreenQloud, sem mun tala um mikilvægi öflugra stjórnenda og þörfina fyrir fleiri konur í þeim hópi. Vala, einn stofnandi Start-up Kids, kemur og talar um hvað þarf til þess að ná árangri sem frumkvöðull og Alma, verkefnastjóri hjá Actavis, mætir og ræðir um hvað felst í árangursríkri verkefnastjórnun og hvernig þú setur þínar hugmyndir í framkvæmd.“

„Síðast en ekki síst koma handhafar „Markaðsmaður ársins“ 2012 og 2011, þau Lív forstjóri NOVA, og Jón, framkvæmdastjóri Íslandsstofu og ræða um hvað þarf til þess að ná árangri.“ segir Armina og bætir við að eitt af lykilhlutverkum AISEC sé einmitt að hjálpa stúdentum að ná árangri á sínum framtíðar starfsvettvangi.

Þátttaka í viðburðinum er ókeypis og opin öllum. Monitor mælir með því að þú skellir þér niður í Hitt hús á laugardaginn og takir þátt í dagskránni en nánari upplýsingar um viðburðinn má finna hér.