Leikarinn ungi Angus T. Jones hefur sagt skilið við hlutverk sitt sem Jake Harper í þáttunum Two And A Half Men.
Samkvæmt meðleikara hans, Ashton Kutcher, ætlar Jones að einbeita sér að námi.
Jones var aðeins 10 ára gamall þegar hann landaði hlutverki í þáttunum vinsælu Two And A Half Men en í dag er Jones 19 ára gamall.
„Hann hefur eytt allri sinni bernsku í að leika í þáttunum en núna hefur hann áttað sig á að hann langar í skóla, hann langar til að verða eðlilegur strákur,“ sagði Kutcher.
Jones, sem er talinn hafa fengið um 717 milljónir íslenskra króna í laun á ári, hefur enn ekki staðfest sögusagnirnar sjálfur.