Ólafur Darri í bandarískum spennuþætti

„Ég er ekki í stóru hlutverki, mesta lagi tveimur þáttum,“ segir leikarinn Ólafur Darri Ólafsson sem bregður fyrir í nýjustu stiklu af þættinum True Detective sem beðið er með mikilli eftirvæntingu.

Kapalstöðin HBO frumsýnir þættina í byrjun næsta árs og fara stórleikararnir Matthew McConaughey og Woody Harrelson með aðalhlutverkin. Leika rannsóknarlögreglumenn sem eru á höttunum eftir raðmorðingja. „Þetta verður rosalega flott sería. Ég hlakka mikið til að sjá þetta,“ segir íslenski stórleikarinn sem getur ekkert gefið upp um hlutverk sitt. „Ég get ekki svarað neinum svoleiðis spurningum – því miður.

Ég get sagt að það var rosalega gaman að gera þetta. Þetta var tekið upp í New Orleans og var mikið ævintýri.“ Hann segir að Matthew McConaughey sé magnaður leikari og góður maður. „Hann er æðislegur, frábær leikari.“