Leikaraparið Mila Kunis og Ashton Kutcher eru sögð vilja gifta sig áður en frumburður þeirra fæðist og stefna þau á borgaralega vígslu. Þetta er haft eftir heimildarmanni dagblaðsins The Sun.
Kunis er sögð vilja litla og hófsama athöfn að viðstöddum fjölskyldum þeirra beggja. Þá eru jafnvel uppi hugmyndir um grillveislu í bakgarði þeirra að lokinni athöfn.
Þá er Kutcher sagður vilja halda upp á giftinguna með pomp og prakt seinna á árinu í Suður-Frakklandi. Kunis er sátt við þau áform svo lengi sem vel gangi að aðlagast foreldrahlutverkinu en heimildir herma að þau ætli sér að sinna foreldrahlutverkinu vel og ekki ráða barnfóstrur fyrir barnið þrátt fyrir annríki þeirra beggja.