Vildu reka Bieber úr landi

Í janúar var Justin Bieber handtekinn fyrir að keyra undir áhrifum áfengis og ólöglegan kappakstur.

Nú hafa hátt í 300 þúsund Bandaríkjamenn skrifað nafn sitt á undirskriftarlista þar sem Hvíta húsið er hvatt til að ógilda græna kortið hans og senda hann aftur til Kanada.

Þegar undirskriftalistar ná stuðningi yfir 100 þúsund einstaklinga þarf Hvíta húsið að senda frá sér opinbera yfirlýsingu um efni þeirra. Að sjálfsögðu var brugðist við fyrrnefndum undirskriftalista en ekki með þeim hætti sem margir höfðu vonast eftir.

Í yfirlýsingu Hvíta húsins segir „Leitt að valda vonbrigðum en við ætlum ekki að tjá okkur um þetta mál.“ Tekið er fram að Hvíta húsið þarf ekki að taka afstöðu í ákveðnum tilfellum en aftur á móti sé það gleðiefni að almenningur láti málefni innflytjenda sig varða þar sem kerfið er gallað eins og það er í dag. Of margir atvinnurekendur leiki sér að kerfinu með því að ráða starfsfólk án tilskilinna leyfa og að um 11 milljónir manna lifi nú í skuggunum.

Það verður seint sagt um Bieber að hann hafi lifað í skugganum hingað til en það ætti í það minnsta að gleðja hann að Obama hyggst ekki sparka honum aftur til Kanada.

• 1 blogg um fréttina

Bloggað um fréttina

• Jóhannes Ragnarsson: Hinir siðlausu Bíbirfeðgar eru óalandi vágestir hvar sem þeir koma