Lágfiðlu- og píanóleikaranum Bjarna Frímanni Bjarnasyni verður í upphafi nýs árs veitt viðurkenning úr styrktarsjóði Önnu K. Nordal og er þetta í fimmtánda sinn sem viðurkenning er veitt úr honum. Sjóðnum ber að styrkja efnilega tónlistarnema í söng og fíólínspili.

Af þessu tilefni verða haldnir tónleikar í Salnum laugardaginn 3. janúar með Bjarna Frímanni og söngvaranum Kristjáni Jóhannessyni, en hann hlaut einmitt sömu viðurkenningu í ár. Á tónleikunum munu  þeir flytja fjölbreytta efnisskrá ásamt Jónasi Ingimundarsyni þar sem lágfiðla, píanó og söngur koma við sögu.

Hefur komið fram víðsvegar um Evrópu

Bjarni Frímann Bjarnason er fæddur árið 1989 og hóf að leika á fiðlu fjögurra ára gamall og stundaði nám hjá Lilju Hjaltadóttur og Guðnýju Guðmundsdóttur. Hann lauk prófi í lágfiðluleik frá Listaháskóla Íslands vorið 2009. Sama ár bar hann sigur úr býtum í einleikarakeppni skólans og Sinfóníuhljómsveitar Íslands og lék lágfiðlukonsert Bartóks með sveitinni á tónleikum í janúar.

Frá 2011 hefur hann stundað nám í hljómsveitarstjórn undir handleiðslu Fred Buttkewitz við Tónlistarháskólann Hanns Eisler í Berlín. Vorið 2012 vann hann fyrstu verðlaun í Hanns Eisler-keppninni í Berlín fyrir frumflutning á píanótilbrigðum eftir Viktor Orra Árnason ásamt öðrum verðlaunum fyrir frumflutning á píanókonsert eftir Ansgar Beste. Sama ár hlaut hann undirleikaraverðlaunin í ljóðasöngskeppni sem kennd er við Paulu Salomon-Lindberg í sömu borg.

Bjarni hefur komið fram víðsvegar um Evrópu, bæði sem strengja- og hljómborðsleikari. Hann stjórnar strengjasveitinni Skark, sem hefur á undanförnum árum staðið fyrir nýstárlegum flutningi nútímatónlistar. Þá stjórnaði hann Sinfóníuhljómsveit Unga Fólksins á tónleikum hennar á Siglufirði og í Reykjavík í júlí 2014.

Viðtal Kolbrúnar Bergþórsdóttur við Bjarna Frímann

• Blogga um frétt