Boys með tónleika í Kaplakrika

Þann 31. janúar næstkomandi mun skærasta stjarna pólskrar diskótónlistar (disco polo), hljómsveitin Boys, halda tónleika í Kaplakrika í Hafnarfirði, auk söngkonunnar Evu Basta og föruneytis hennar.

Gert er ráð fyrir að um 1000 gestir mæti á tónleikana. Það er óhætt að segja að hér sé um að ræða stærsta pólska tónlistarviðburðinn sem fram hefur farið á Íslandi til þessa.

Hljómsveitin Boys var stofnuð árið 1991 og er vel þekkt í Póllandi. Sveitin hefur fengið tvær gullplötur og fimm platínuplötur auk fjölmargra tónlistarverðlauna. Forsprakki hljómsveitarinnar, Marcin Miller, hefur löngum verið kallaður konungur pólskrar diskótónlistar. Tónlistarstefnan á sér marga aðdáendur í Póllandi enn þann dag í dag þó svo að gullaldartímabil diskótónlistar hafi verið á árunum 1970-1980. Eva Basta er hins vegar ný á diskósenunni því hún skaust upp á stjörnuhimininn árið 2011.

Miða á tónleikana má nálgast á heimasíðu IcelandNews.is en einnig verða seldir miðar við innganginn fyrir tónleikana.

• Blogga um frétt