Grunnskólinn á Ísafirði er kominn í úrslit í Skólahreysti eftir að hafa sigrað Vestfjarðarriðilinn í undankeppninni. Þau eru vön pressunni sem fylgir úrslitunum en þangað hafa þau alltaf komist nema tvisvar.

Katrín Ósk Einarsdóttir þýtur af stað í hraðaþrautinni en þetta er annað árið sem hún tekur þátt í Skólahreysti. Hún æfir á gönguskíði en það og aðrar vetraríþróttir eru hennar helstu áhugamál. Með henni í hraðaþrautinni keppir Gunnar Þór Valdimarsson sem keppir einnig í annað sinn í Skólahreysti. Hann æfir fimleika, körfubolta og crossfit og hefur mikinn áhuga á snjóbrettaiðkun, fara í ræktina og skjóta af boga í bogfimi.

Guðný Birna Sigurgeirsdóttir keppir fyrir hönd Ísfirðinga í armbeygjum og hreystigreip. Hún er að taka þátt í keppninni í þriðja sinn en hún æfir sund og er það einnig hennar aðal áhugamál. Einar Torfi Torfason dýfir sér svo í dýfingar og upphífingar. Hann er eini nýliðinn í hópnum en hann æfir glímu og jiu-jitsu og hans helsta áhugamál er MMA bardagaíþróttir.

Guðný Stefanía Stefánsdóttir, þjálfari liðsins, segir alla spennta fyrir morgundeginum. „Stemningin er rosalega fín og hér eru allir fullir tilhlökkunar. Keppendurnir keyra í dag vegna þess að það lítur ekki vel út með flug en stuðningsliðið kemur á morgun með rútu,“ sagði hún í samtali við blaðamann mbl.

Hún, ólíkt blaðamanni, lítur ekki á þetta sem langt ferðalag. „Það virkar alltaf lengra út á land en í bæinn og við erum svo vön þessu. Ég kom keyrandi hingað á sunnudaginn og fer aftur á morgun.“

Skólahreysti er kennt sem valáfangi á Ísafirði og þaðan eru krakkar sigtaðir út sem síðan keppa fyrir hönd skólans í keppninni. „Eftir áramót hefur þetta verið átta manna hópur sem æfir saman einu sinni í viku.“

Ísfirðingar láta sitt ekki eftir liggja við stuðninginn. „Við búumst við því að fjörtíu krakkar fari með rútunni og svo eru einhverjir í Reykjavík. Allt í allt áætlum við að svona fimmtíu krakkar styðji okkur á morgun.“

Krakkarnir eru staðráðnir í að standa sig vel á stóra sviðinu. „Markmiðið er að bæta sig frá undankeppninni. Þetta er líka svo frábært tækifæri fyrir okkur á landsbyggðinni til að taka þátt í svona skemmtilegri keppni,“ sagði Guðný Stefanía að lokum.

Hnot­skurn

• Skóla­hreysti er liðakeppni milli grunn­skóla lands­ins.
• Skóla­hreysti byrjaði árið 2005 með þátt­töku sex skóla. Í ár voru um 110 grunn­skól­ar af öllu land­inu sem tóku þátt.
• Kepp­end­ur eru um 700 tals­ins ár­lega og um 13.000 áhorf­end­ur koma til að styðja við sín lið.
• Úrslita­keppni þeirra tólf skóla sem náðu best­um ár­angri í und­an­keppn­un­um fer fram miðviku­dag­inn 22. apríl næst­kom­andi.
• Keppn­is­grein­arn­ar eru upphíf­ing­ar, arm­beygj­ur, dýf­ur, hreystigreip og hraðaþraut.

Tengdar fréttir

Skólahreysti 2015

Holtaskóli sigraði í Skólahreysti

• Gera sitt besta eða koma ekki aftur
• „Við erum gul og glöð“
• Sigurhefð í Holtaskóla
• Ætla að bæta árangurinn

» Fleiri tengdar fréttir

• Blogga um frétt