Þegar kom að því að því að velja fötin sem hún myndi klæðast er hún kynnti dóttur sína fyrir umheiminum varð einn af eftirlætis hönnuðum hennar, Jenny Packham, fyrir valinu. Packham aðstoðaði Katrínu einnig við fatavalið er Georg kom í heiminn.

Kjóllinn í gær var mjög sumarlegur, skreyttur gulum, litlum blómum. 

Persónulegur aðstoðarmaður Katrínar, Natasha Archer, aðstoðaði svo hertogaynjuna við ýmislegt annað á sjúkrahúsinu. Archer hefur unnið um hríð fyrir kóngafjölskylduna. 

Þá er Katrín með aðra aðstoðarkonu, einkaritara, Rebeccu Deacon. Í frétt Telegraph segir að hún hafi verið meðal þeirra fyrstu sem fengu að sjá litlu prinsessuna eftir að hún kom í heiminn í gærmorgun. Deacon vann áður fyrir góðgerðarsamtök Harrys prins og er því vel kunn fjölskyldunni.

Þá er Jason Knauf upplýsingafulltrúi nýjasti meðlimur teymis hertogans og hertogaynjunnar. Hann vann áður sem upplýsingafulltrúi Royal Bank of Scotland.  Knauf er bandarískur og nam m.a. stjórnmálafræði í Nýja Sjálandi. Hann sá um að skipuleggja alla dagskrána í gær sem og síðustu vikur og einnig komandi vikur. Eitt af hlutverkum hans var að sjá til þess að fjölmiðlamenn kæmust að sjúkrahúsinu, en þó án þess að trufla heilbrigðisstarfsfólkið.

Þrátt fyrir allt þetta er Katrín ekkert öðruvísi en aðrar nýbakaðar mæður. Hún er geislandi glöð með dóttur sína en mun næstu daga taka það rólega á heimili sínu í Kensington-höll. Nokkuð líklegt er að hún muni hafa barnfóstru sér til aðstoðar, líkt og hefð er fyrir í konungsfjölskyldunni.

Katrín hertogaynja fæddi barn þeirra Vilhjálms kl. 8.34 í gærmorgun. Hún kom svo út af sjúkrahúsinu með dótturina kl. 6.10 síðdegis, eða um tíu tímum eftir að litla prinsessan kom í heiminn.