Finnur Atli og Helena trúlofuð

Finnur Atli Magnússon og Helena Sverrisdóttir, körfuboltapar, eru trúlofuð. Síðustu dagar hafa því svo sannarlega verið viðburðarríkir hjá þeim.

Finnur Atli varð Íslandsmeistari í körfuknattleik karla með KR síðastliðinn miðvikudag og Helena er að ganga í raðir Hauka, þar sem hún verður einnig aðstoðarþjálfari. Það var síðan í gær sem Finnur innsiglaði ástina hjá þessu mikla boltapari.

„Já, síðustu dagar hafa verið skemmtilegir,“ sagði Finnur Atli í samtali við mbl.is í morgun. Íslandsmeistaratitillinn hafi verið mjög skemmtilegur og gærdagurinn hafi verið afar ljúfur. „Það er ár síðan við byrjuðum saman og þetta var búið að vera í bígerð hjá mér í smá tíma.“

Hann sagði bónorðið sjálft hafa verið afar huggulegt. „Ég eldaði fyrir hana heima og svo bað ég hennar. Það var ekkert húllumhæ í kringum þetta, ég vildi bara gera þetta persónulegt,“ sagði nýtrúlofaður Finnur Atli Magnússon.

Finnur Atli í baráttu gegn Tindastól mbl.is/Kristinn Ingvarsson

• Blogga um frétt