Heiða Rún er gestaleikari í Death in Paradise

Heiða Rún Sigurðardóttir, eða Heida Reed eins og hún kallast í Bretlandi, kemur fram sem gestaleikari í fimmtu seríu hinnar geysivinsælu bresku sjónvarpsþáttaraðar Death in Paradise.

Frá þessu er greint í fréttamiðlum í Bretlandi og vestanhafs svo sem í Huffington Post en aðrir gestaleikarar í nýjustu þáttaröðinni eru meðal annarra Paul Nicholls úr sjónvarpsþáttunum The C Word, Emma Catherine Rigby úr sjónvarpsþáttunum Hollyoaks og Charlotte Hope úr Game of Thrones.

Frétt mbl.is: Átta milljónir fylgjast með Heiðu

Death in Paradise hefur í fjögur ár verið ein vinsælasta sjónvarpsþáttaröð BBC-sjónvarpsstöðvarinnar og hlotið mikið lof gagnrýnenda. Þættirnir, sem teknir eru upp á frönsk-karabísku eyjunni Guadeloupe, eru blanda af drama, spennu og fyndni.

Þættirnir verða teknir til sýningar í byrjun árs 2016.

Sýningar hófust á Poldark síðasta sunnudag en sem kunnugt er hefur Heiða Rún gert nokkurra ára samning um að leika í þáttunum, sem notið hafa mikilla vinsælda í Bretlandi.