Kastaði upp á tökustað

Það er ekki tekið út með sældinni að vera umsjónarmaður Top Gear eins og hinn nýi þáttastjórnandi Chris Evans komst að á dögunum.

Evans var farþegi í Audi R8 V10 ásamt samstarfskonu hans, fyrrverandi atvinnuökumanninum Sabine Schmitz. Eitthvað virðist ökulag Schmitz þó hafa farið illa í Evans, enda bað hann kollega sinn vinsamlegast um að stöðva bílinn, því hann þurfti að kasta upp. Evans náði ekki að forðast vökult auga ljósmyndara sem festi atvikið á filmu líkt og fram kemur í frétt Daily Mail.

Evans játaði seinna í viðtali að hann hafi átt erfitt með að fóta sig í nýju hlutverki, þegar hann lýsti fyrstu tökudögunum sem hálfgerðri eldskírn.

Evans tók við keflinu af Jeremy Clarkson, sem sagt var upp störfum eftir að hafa veist að samstarfsmanni. Fyrrverandi meðstjórnendur þáttarins, Richard Hammond og James May fylgdu Clarkson síðan yfir á Amazon, þar sem þeir stjórna nýjum bílaþætti.