„Aldrei skammast mín jafn mikið“

Skiptar skoðanir hafa verið upp um atriði rappsveitarinnar Reykjavíkurdætra í dægurmálaþættinum Vikunni á RÚV í gærkvöldi. Sumir hafa fagnað sveitinni og sagt atriðið mikilvægt í jafnréttisbaráttunni á meðan öðrum fannst atriðið óviðeigandi en flutt var lagið Ógeðsleg. Í atriðinu voru meðlimir sveitarinnar klæddir í sjúkrahús klæðnað og var ein þeirra með gervilim eða svokallað „strap-on“.

Mesta athygli vakti þó að leikkonan Ágústa Eva Erlendsdóttir, sem var gestur þáttarins, stóð upp þegar að lítið var eftir af laginu og gekk út. Á Facebook sagði leikkonan að hún hefði aldrei áður orðið vitni af þvílíkri „drullu og yfirgangi og ósmekklegheitum“.

Gagnrýndi hún sveitina og RÚV „fyrir að koma með þetta rusl í fjölskyldudagskrá á ríkissjónvarpi.“ Þá skoraði hún á fólk að lesa textann við lagið Ógeðsleg. „Oft hef ég fengið kjánahroll en aldrei skammast mín jafn mikið og nú.“

Margir hafa þó tekið upp hanskann fyrir Reykjavíkurdætur og sagt m.a. að karlmenn hefðu getað komist upp með sömu sviðsframkomu án gagnrýni.

Rappsveitin Úlfur Úlfur, sem skipuð er tveimur karlmönnum, benti á á Twitter að  þeirra textar væru líkar grófir, án þess að þeir séu gagnrýndir fyrir það.

Við hrópum "sjúgðu á mér tittlinginn" og allir fagna en þegar @RVKdaetur tala um sníp eru kyndlar og heygafflar dregnir fram. Stfu

— ÚLFUR ÚLFUR!! (@ulfurulfur) February 27, 2016

Hversu gamall er maður orðinn þegar Silvía Nótt er orðin miðaldra? #vikan

— hugleikur dagsson (@hugleikur) February 27, 2016

Til hamingju Ísland með að Reykjavíkurdætur fæddust hér #vikan

— Bylgja Babýlons (@bylgja_babylons) February 27, 2016

Þolum við betur outrageous rappara af karlkyni en kvenkyni? #vikan

— Katrín Júlíusdóttir (@katrinjul) February 27, 2016

Ekki náðist í Gísla Martein Baldursson, stjórnanda Vikunnar eða Skarphéðinn Guðmundsson, dagskrástjóra RÚV við gerð þessarar fréttar. 

Ágústa Eva Erlendsdóttir mbl.is/Eggert Jóhannesson

• 1 blogg um fréttina

Bloggað um fréttina

• Kristin stjórnmálasamtök: Ríkiskostaðri lágkúru hossað í þætti Gísla Marteins