Hljómsveitin Rolling Stones kom fram á Kúbu í fyrsta skipti í gærkvöldi og var tónleikanna beðið með mikilli eftirvæntingu. Hundruð þúsunda gesta voru á tónleikunum í Havana og segja fréttamenn að tónleikarnir marki ákveðin tímamót og Kúba verði aldrei söm. Hvort sem það er rétt þá er ljóst að fólk skemmti sér vel á tónleikunum sem voru haldnir á Ciudad Deportiva íþróttaleikvanginum sem rúmar 450 þúsund gesti.
Það reyndist ekki nóg því allar götur í nágrenninu voru yfirfullar og víða mátti sjá fólk dilla sér á húsþökum í nágrenninu.
„Við vitum að það var erfitt að hlusta á tónlist okkar á Kúbu fyrir ári síðan en nú erum við að spila hér,“ sagði Mick Jagger þegar hann ávarpaði tónleikagesti á spænsku. Hann segir að það sé greinilegt að tímarnir séu að breytast.
En þrátt fyrir að tónlist Rolling Stones hafi ekki ómað opinberlega í áratugi á Kúbu þá þekktu gestir vel helstu slagara sveitarinnar og tóku undir hástöðum í lögum eins og Out of Control og Satisfaction.