Chris Evans hættir í Top Gear

Chris Evans, nýr þáttastjórnandi Top Gear, hefur sagt starfi sínu lausu og gengið út. Stutt er síðan Evans tók við kefl­inu af Jeremy Cl­ark­son, en aðeins eru sjö mánuðir liðnir af þriggja ára samn­ingi hans við sjón­varps­stöðina BBC.

Að sögn hafði Evans fengið sig fullsadd­an að af­skipta­semi yf­ir­stjórn­enda sinna, auk þess sem hann er sagður hafa verið ósátt­ur við að fá ekki jafn mikið list­rænt frelsi og fyr­ir­veri hans. Þá kemur uppsögnin í kjölfar rannsóknar bresku lögreglunnar á kynferðisbroti sem Evans hefur verið sakaður um, en fyrrverandi samstarfskona hans sakaði hann um að hafa gripið í brjóst sitt fyrir rúmum 20 árum. 

Sýn­ing­ar á nýj­um Top Gear þátt­um hófust í maí. Áhorf á sjón­varpsþátt­inn Top Gear hef­ur hríðfallið eft­ir að nýir kynn­ar tóku við, en Chris Evans og Matt LeBlanc tóku við kefl­inu af Jeremy Cl­ark­son, James May og Rich­ard Hammond.

Cl­ark­son var á sín­um tíma sagt upp störf­um eft­ir að hafa veist að sam­starfs­manni sín­um, en í kjöl­farið sögðu May og Hammond starfi sínu lausu. Þre­menn­ing­arn­ir færðu sig síðan yfir til streym­isveit­unn­ar Amazon Prime, þar sem þeir munu stýra nýj­um bílaþætti.

Fyrsti þátt­ur nýrr­ar þátt­araðar Top Gear fór í loftið í maí, en 4,4 millj­ón­ir manns fylgd­ust með frum­raun Evans og LeBlanc. Þátt­ur­inn hlaut frem­ur nei­kvæð viðbrögð og var jafn­vel kallaður „Flop Gear“ af gár­ung­um á net­inu. Áhorfið hríðféll svo á milli vikna, því að ein­ung­is fylgd­ust 2,8 millj­ón­ir manna með út­send­ing­unni á öðrum þætti.

• Blogga um frétt