Leikkonan Heiða Rún Sigurðardóttir, eða Heida Reed líkt og hún er kölluð ytra, var gestur í sjónvarpsþættinum This Morning í gær.
Heiða, sem fer með hlutverk í hinum vinsælu sjónvarpsþáttum Poldark, varð fyrir því óláni að missa út úr sér blótsyrði í beinni útsendingu, sem virðist hafa farið fyrir brjóstið á þáttastjórnandanum Phillip Schofield. Í það minnsta baðst hann afsökunar á orðbragðinu, fyrir hönd Heiðu, líkt og sjá má á frétt Daily Mail.
Leikkonan var að lýsa veðurfari á tökustað, en þættirnir voru meðal annars teknir upp í Cornwall, og sagði að einn daginn hefði verið mígandi rigning. Í eyrum okkar Íslendinga kann það að hljóma fremur saklaust, en orðið „pissing“ þykir augljóslega ekki við hæfi í bresku sjónvarpi.
Myndband af viðtalinu má sjá hér að neðan.