Carrie Fisher hefur verið lögð til hinstu hvílu, við hlið móður sinnar Debbie Reynolds, og var aska hennar var borin í duftkeri í laginu eins og risavaxin Prozac-tafla.

Útfararathöfnin fór fram í kyrrþey, en Fisher, 60 ára, og Reynolds, 84 ára, létust með aðeins dags millibili í desember.

Frétt mbl.is: Munu hvíla hlið við hlið

Fisher, sem einna best er þekkt fyrir leik sinn í hlutverki Leiu prinsessu í Stjörnustríðsmyndunum, var opinská um reynslu sína af geðsjúkdómum.

Þarna myndi hún vilja vera

Eftir athöfnina, sem fram fór í Forest Lawn Memorial-garðinum í Hollywood-hæðum Los Angeles-borgar, sagði Todd Fisher, bróðir Carrie, að „taflan“ hefði orðið fyrir valinu vegna þess að systir hans hélt mikið upp á hana.

„Hún elskaði töfluna, sem var í húsinu hennar, og okkur Billie [dóttur Carrie] fannst að þarna myndi hún vilja vera.“

Bætti hann við að Fisher og móðir hennar væru nú saman, og að þær myndu vera „saman hér og í himnaríki“.

Engar aðrar upplýsingar voru gefnar upp um athöfnina, samkvæmt frétt BBC.

Þunglyndislyfið Prozac kom fyrst á markað í Bandaríkjunum árið 1988 og ári síðar í Bretlandi.

Tengdar fréttir

Carrie Fisher og Debbie Reynolds látnar

Fisher glímdi við kæfisvefn

• Næsta mynd sú síðasta sem Leia birtist í
• Heiðruðu minningu Carrie Fisher og Debbie Reynolds
• Líkamsleifar Fisher voru brenndar
• Munu hvíla hlið við hlið

» Fleiri tengdar fréttir

• Blogga um frétt