Óskarsakademían hefur beðið leikara og annað starfslið kvikmyndanna La La Land og Moonight innilegrar afsökunar á mistökunum sem urðu til þess að leikararnir Warren Beatty og Fay Dunaway lásu upp nafn rangrar myndar í flokknum besta kvikmyndin á Óskarnum aðfararnótt mánudags.

Akademían sagði að þeir sem komu að báðum myndunum hafi sýnt „gífurlega mikla reisn“ og bætti við að upplifun þeirra af kvöldstundinni hafi „breyst stórkostlega vegna mistakanna“.

Frétt af mbl.is

Hvað klikkaði með umslagið?

Í yfirlýsingunni kemur fram að endurskoðendafyrirtækið PwC, sem áður hét Price Waterhouse Coopers, hafi gengist við ábyrgð á þeim „brotum á formföstum starfsreglum“ sem leiddu til mistakanna.

„Við höfum eytt síðustu nótt og deginum í dag við að rannsaka það sem gerðist og munum í framhaldinu ákveða hvernig brugðist verður við,“ sagði í yfirlýsingunni.

Mikil ringulreið ríkti eftir að tilkynnt hafði verið um mistökin. AFP

PwC gaf einnig út yfirlýsingu þar sem kom fram að starfslið þess hafi ekki brugðist nógu snöggt við. Skuldinni var jafnframt skellt á samstarfsmann fyrirtækisins, Brian Cullinan, annars tveggja endurskoðendanna sem áttu að láta kynnana hafa réttum umslögin í hendurnar, að því er The Guardian greinir frá. 

PwC sagði að röð mistaka hefðu verið gerð og að Brian Cullinan og samstarfskona hans Martha Ruiz hafi ekki brugðist nógu snöggt við þegar La La Land var tilkynnt fyrir mistök sem sigurvegari.

Meira en tvær mínútur tók að leiðrétta mistökin frá því Beatty og Dunaway tilkynntu um hinn ranga sigurvegara.

Kynnirinn Jimmy Kimmel baksviðs. AFP

„PwC ber fulla ábyrgð þeirri röð mistaka og brota á formföstum starfsreglum á Óskarsverðlaununum,“ sagði í tilkynningunni. Þar kom fram að Cullinan hefði fyrir mistök látið Beatty og Dunaway fá umslagið fyrir bestu leikkonuna en Emma Stone hafði unnið þau verðlaun fyrir La La Land.

„Undanfarin 83 ár hefur akademían treyst okkur í PwC fyrir framkvæmd verðlaunaafhendingarinnar á meðan á athöfninni stendur og síðustu nótt brugðumst við akademíunni,“ sagði í yfirlýsingunni.

Beatty, Dunaway, kynnirinn Jimmy Kimmel og aðstandendur kvikmyndanna tveggja voru jafnframt beðin afsökunar.

Tengdar fréttir

Óskarsverðlaunin 2017

Kimmel snýr aftur sem kynnir

• Kimmel snýr aftur sem kynnir
• Fengu líflátshótanir eftir Óskarsklúðrið
• Næst minnsta áhorf í sögu Óskarsins
• Óskarinn minntist konu sem er á lífi

» Fleiri tengdar fréttir

• 1 blogg um fréttina

Bloggað um fréttina

• Njörður Helgason: Gert fyrir Trumb