Stuðmannasöngleikur í Þjóðleikhúsinu

Slá í gegn! nefnist nýr söngleikur sem frumsýndur verður á Stóra sviði Þjóðleikhússins í febrúar 2018. Verkið skrifar Guðjón Davíð Karlsson, sem jafnframt leikstýrir, og er því lýst sem óði til tónlistar Stuðmanna.

Selma Björnsdóttir semur dansa ásamt því að leika, en í öðrum lykilhlutverkum eru Stefán Karl Stefánsson, Ólafía Hrönn Jónsdóttir, Örn Árnason og Eggert Þorleifsson.

Leikurinn gerist í félagsheimili úti á landi þar sem leikfélagið á staðnum fagnar 100 ára afmæli. Einhverjir í leikhópnum vilja setja upp söngleikinn Með allt á hreinu, en formaður leikfélagsins vill hámenningarlega dagskrá með hápunktum úr sögu leikfélagsins. Af stað fer bráðfyndin atburðarás, þar sem kostulegum persónum lendir saman, gömlum leyndarmálum er þyrlað upp í loft og ástin blómstrar óvænt þar sem síst skyldi.

• Blogga um frétt