Starfsfólk Depp vissi um heimilisofbeldið

Umboðsmenn Johnny Depp vissu að hann gengi í skrokk á fyrrverandi eiginkonu sinni, Amber Heard, samkvæmt nýjum dómsgögnum. 

Í gögnunum kemur fram að starfsmönnum leikarans þætti hann vera mjög skapvondur og hefðu séð hann nokkrum sinnum leggja hendur á Heard. Einnig lýsa þeir atviki þar sem Depp sparkaði harkalega í leikkonuna árið 2014.

Upplýsingarnar koma fram í gögnum frá fyrrverandi umboðsfyrirtæki leikarans, TMG, en Depp er að höfða mál gegn því fyrir að fara illa með peninga hans. TMG hefur barist á móti ásökununum og segir að leikarinn beri sjálfur ábyrgð á slæmum fjárhag. 

Skilnaður Depp og Heard í fyrra var fjandsamlegur og það var þá sem Depp var ásakaður um heimilisofbeldi fyrst þegar Heard birti sms-skilaboð á milli hennar og aðstoðarkonu Depp þar sem aðstoðarkona leikarans biður Heard afsökunar á sláandi hegðun hans. 

Depp hefur sífellt neitað öllum sökum.