Ása Helga valin besti leikstjórinn

Ása Helga Hjörleifsdóttir, handritshöfundur og leikstjóri kvikmyndarinnar Svanurinn, hlaut á föstudag verðlaun fyrir bestu leikstjórn á kvikmyndahátíðinni í Kolkata á Indlandi.

Svanurinn fjallar um níu ára stúlku sem send er í sveit og lendir þar í aðstæðum sem hún á í basli við að kljást við, þó að hún sé sjálfstæð og hugmyndarík. Gríma Valsdóttir leikur stúlkuna en önnur aðalhlutverk leika Þorvaldur Davíð Kristjánsson, Þuríður Blær Jóhannsdóttir, Ingvar E. Sigurðsson og Katla Margrét Þorgeirsdóttir.

Svanurinn, sem byggð er á samnefndri verðlaunaskáldsögu eftir Guðberg Bergsson, var frumsýnd á kvikmyndahátíðinni í Toronto í september og hefur myndin hlotið góðar viðtökur og dóma.

Birgitta Björnsdóttir og Hlín Jóhannesdóttir eru aðalframleiðendur Svansins en myndin er þriggja landa samframleiðsla milli Íslands, Þýskalands og Eistlands. Myndin verður frumsýnd á Íslandi í byrjun janúar.

• Blogga um frétt