Veröld/Fólk | mbl | 1.2.2018 | 8:30 | Uppfært 11:56

Lóan „sömpluð“ í nýjasta laginu

Greta Salome Stefánsdóttir var að gefa út lagið Wildfire sem er jafnframt lokalag myndarinnar um Lóa, sem verður frumsýnd 2. febrúar og er talin dýrasta teiknimynd sem gerð hefur verið hérlendis. Mynd: Begga Svavars

Það skortir ekki verkefni hjá söngkonunni Gretu Salóme sem var að gefa út lagið Wildfire, sem tengist íslensku myndinni Lói. Hún er einnig með lag í bresku Eurovision-keppninni, auk þess sem hún er nú að undirbúa og setja upp söngleikina Moulin Rouge og Phantom of the Opera. Magasínið, síðdegisþátturinn á K100, fékk Gretu Salome í spjall í vikunni til að ræða lifið og verkefnin framundan.

Með lag í bresku Eurovision-keppninni

Greta Salóme er meðhöfundur lags sem keppir í undankeppni Eurovision í ár í Bretlandi. Greta lýsir ferlinu og aðdragandum þannig að BBC hafi haft samband við sig í september og þeir hafi boðið nokkrum lagahöfundum til Danmerkur. Þeir höfðu þá valið rúmlega 20 lagahöfunda sem var boðið að koma saman og semja lög. „Okkar verkefni var að semja stuðlag og þannig varð þetta lag til,“ segir Greta, en þeir Emil Rosendal Lei og Samir Salah Elshafie eru meðhöfundar lagsins sem hlaut nafnið Crazy.

Þau fengu engin loforð um að lögin úr söngbúðunum yrðu valin, en þeirra lag var valið og stutt er síðan hún hitti Raya, söngkonuna sem mun flytja lagið, þann 7. febrúar þegar Bretar velja Eurovision-lag sitt.

Lóan og Tiny með í nýjasta laginu

Wildfire er nýjasta lag Gretu Salome og jafnframt titillag myndarinnar Lói – þú flýgur aldrei einn, sem verður frumsýnd hér á landi 2. febrúar. Nú þegar hafa 55 lönd keypt kvikmyndaréttinn og er talað um að myndin sé ein dýrasta íslenska teiknimyndin sem gerð hefur verið, en hún kostaði rúman milljarð og var sex ár í vinnslu.

Spurð út í aðdragandann að þessu samstarfi, segist hún hafa fengið símtal í desember frá Atla Örvarssyni sem sér um tónlistina í kvikmyndinni. Þar falaðist hann eftir samstarfi við Gretu Salome með titilag myndarinnar. Hún sló til og hitti Emil Lei og þau sömdu lagið á fjórum sólahringum.

Myndin fjallar um litla lóu sem þarf að lifa af veturinn. Þau kynntu sér hljóð lóunnar sem eru notuðu í viðlagi lagsins. Að auki fengu þau íslenska rapparann Tiny úr hljómsveitinni Quarashi til liðs við sig.

Viðtalið má nálgast hér að neðan.