Veröld/Fólk | mbl | 18.3.2018 | 15:21 | Uppfært 15:36

Músíktilraunir í Hörpu í kvöld

Mynd 1 af 7 Vinkonurnar í Madre Mia eru fjórtán og fimmtán ára, búa á Akranes og spila indískotið popp. Þær heita Katrín Lea Daðadóttir, sem syngur og leikur bassi og kassatrommu, Hekla María Arnardóttir, sem syngur og leikur á gítar, og Sigríður Sól Þórarinsdóttir, sem syngur og leikur á hljómborð. Þær hafa allar sterkan grunn í tónlist eftir að hafa verið lengi í Tónlistarskólanum á Akranesi og tvær þeirra hafa unnið Hátónsbarkakeppni grunnskólanna á Akranesi og komist inn á Söngvakeppni Samvest.

Mynd 2 af 7 Hljómsveitin Melophobia var stofnuð árið 2012 í bílskúr í Stykkishólmi. Hún kemur nú fram á Músíktilraunum í fjórða sinn, keppti fyrst sem OAS árið 2013, en 2014 og 2016 keppti hún undir nafninu BadNews. Sveitina skipa Hlöðver Smári Oddsson, söngvari og gítarleikari, Friðrik Örn Sigþórsson, bassaleikari og söngvari, Jón Glúmur, gítarleikari, og Hinrik Þór Þórisson trommuleikari. Þeir eru allir um tvítugt og spila háskólarokk.

Mynd 3 af 7 Félagarnir Helgi Freyr Tómasson og Ólafur Kári Ólafsson starfa saman sem Pixel Dream. Þeir eru tvítugir Reykvíkingar og véla báðir um Tölvur, gítar og bassa. Þeir segjast ekki sérhæfa sig í ákveðnum stíl heldur dragi þeir bestu eiginleika úr valdastiga sem flestra tónlistartegunda þar sem hver stefna skari fram úr á einn eða annan hátt.

Mynd 4 af 7 Rappgengið 200 Mafia er af Kársnesinu í Kópavogi, skipuð átta tvítugum piltum sem nota listamannsnöfnin Rino, Land Cruiser, Yung Machete, Svenni Lumm, K2, Fríó, Gaddakylfan og Sultan og passa sig gjarnan á því að vera ekki of miklir Kings, en Kings eru þeir þó. Þeir heita annars Oddur Örn Ólafsson og Huginn Goði Kolbeinsson, sem smiða taka og rappa, Markús Björnsson, sem rappar, og Kári Örvarsson, Guðmundur Hauksson, Sveinn Sigurðarson, Þorgeir Björnsson og Sindri Frans Pálsson, en allir þeir síðarnefndu rappa og skrúfa upp stemmninguna.

Mynd 5 af 7 Ísfirðingurinn Davíð Sighvatsson Rist segist landsbyggðarpiltur, „uppalinn í sveitasælunni í hinum fagra Dýrafirði á Vestfjörðum“. Hann fluttist til höfuðborgarinnar til að læra við Listaháskóla Íslands þar sem hann byrjaði í Tónsmíðum en skipti svo yfir í Skapandi tónlistarmiðlun með áherslu á laga og textasmíði. Davíð er er 23 ára og leikur á gítar og syngur. Helstu fyrirmyndir hans eru Elton John, Ben Howard, Tom Odell, John Mayer, Hozier og Keaton Henson.

Mynd 6 af 7 Magnús Aron Katrínarson notar listamannsnafnið Maron. Hann er 22 ára gamall Akureyringur sem rappar og syngur og segist hafa fallið fyrir textasmíði. Hann vill koma á framfæri sögu sinni og hvernig hægt sá að skemmta fólki án þess að styðjast við efnishyggju og yfirborðskenndar hugsanir.

Mynd 7 af 7 Hugarró er rokksveit úr Eyjafjarðarsveit skipuð þeim Hinrik Erni Brynjólfssyni Haraldi Helgasyni og Ólafi Tryggvasyni. Þeir eru allir sextán ára. Hinrik spilar á gítar og syngur, Haraldur á bassa og Ólafur á trommur. Þeir segjast hafa mikinn áhuga á mörgum tegundum af tónlist, en mest gaman hafi þeir af klassísku pönki.

Músíktilraunir hefjast í Hörpu í kvöld og þá keppa fyrstu sjö sveitirnar um sæti í úrslitum næstkomandi laugardag. Áheyrendur velja eina hljómsveit áfram í kvöld og sérstök dómnefnd aðra, en dómnefndin velur síðan tvær til þrjár hljómsveitir frá kvöldunum fjórum áfram í úrslit sýnist henni svo.

Keppnin hefst kl. 19.30 og verður meðal annars boðið upp á rapp, háskólarokk, gítarpopp, indírokk og tilraunatónlist og hljómsveitirnar eru úr ýmsum áttum; úr Reykjavík, Kópavogi og Eyjafjarðarsveit, frá Akureyri, Akranesi, Stykkishólmi og Ísafirði.