Leikkonan Heather Locklear mun fara í langtíma meðferð við fíkni- og geðsjúkdómum sínum samkvæmt heimildum TMZ. Heimildarmaður TMZ segir að geðsjúkdómur leikkonunnar verði erfiðari viðureignar en fíkn hennar.
Locklear hefur átt erfitt uppdráttar síðustu vikurnar en hún hefur verið flutt á spítala vegna ofbeldisfullrar hegðunar, handtekin fyrir að ráðast að lögreglumönnum og lögð inn á spítala eftir að hafa tekið of stóran skammt af fíkniefnum.
Hún liggur nú inni á geðdeildinni á spítalanum í Los Angeles en mun að öllum líkindum fara í langtímadvöl á annarri stofnun bráðlega. Hún hefur verið samvinnuþýð og hefur samþykkt að fara í langtímameðferð samkvæmt heimildum TMZ.