Rapparinn Mac Miller er látinn

Bandaríski rapparinn Mac Miller fannst látinn á heimili sínu í San Fernando-dal í Kaliforníuríki fyrr í dag, samkvæmt fregnum bandarískra fjölmiðla. Talið er líklegt að rapparinn hafi látist vegna ofskömmtunar eiturlyfja, en hann var 26 ára gamall.

Fjölmiðillinn Vice fjallar um andlát rapparans og segir hann hafa átt erfitt ár að baki. Í maí síðastliðnum var hann ákærður fyrir ölvunarakstur í Los Angeles, en skömmu áður höfðu hann og söngkonan Ariana Grande slitið sambandi sínu.

Fyrsta plata Millers, Blue Slide Park, kom út árið 2011 og skaust frumraunin beint á topp bandaríska Billboard 200-listans og gerði Miller að stórstjörnu.

Síðan gaf Miller út fjórar plötur til viðbótar og sú nýjasta, Swimming, kom út fyrr í sumar. Nýjasta færsla rapparans á Twitter var sett inn fyrir um 20 klukkustundum og þar sagðist hann hlakka mikið til þess að fylgja nýjustu plötu sinni eftir með tónleikaferðalagi um Bandaríkin, sem átti að hefjast 27. október.

Fjölmargir úr tónlistarheiminum hafa þegar brugðist við fregnum af ótímabæru andláti Millers.

• Blogga um frétt