Heiða Rún tilnefnd fyrir hlutverk Stellu

Leikkonan Heiða Rún Sigurðardóttir, betur þekkt sem Heida Reed, er tilnefnd sem besta leikkonan á C21’s International Drama Awards fyrir túlkun sína á Stellu Blómkvist í samnefndum sjónvarpsþáttum. 

Í flokknum um bestu leikkonuna eru tilnefndar, ásamt Heiðu, Claire Foy sem lék drottninguna í The Crown, Amy Adams fyrir Sharp Objects, Jodie Comer og Sandra Oh fyrir leik sinn í Killing Eve og Laura Linney fyrir Ozark.

Heiða Rún hefur gert það gott í leiklistarheiminum en hún lék meðal annars í Poldark sem sýndir hafa verið á RÚV síðustu ár. Þættirnir um Stellu Blómkvist, sem eru framleiddir af Saga Film, slógu í gegn hér á landi og hafa þeir verið á flakki um heiminn, en þeir hafa verið sýndir í Frakklandi, Spáni, Belgíu, Hollandi og á Norðurlöndunum svo eitthvað sé nefnt.

Á hátíðinni eru alls veitt verðlaun í þrettán flokkum og verða þau afhent við hátíðlega athöfn á St. Pancras Renaissance-hótelinu, sem hluti af C21’s Content London-ráðstefnunni, 28. nóvember næstkomandi. 

• Blogga um frétt