Melania með umdeildar jólaskreytingar

Jól­in eru kom­in í Hvíta húsið og sitt sýn­ist hverj­um um skreyt­ing­arn­ar. Á meðan sum­ir eru yfir sig hrifn­ir af rauðu jóla­lit­un­um tala aðrir um blóðrauða ganga, dauða og drunga­leg­heit.

Mel­ania Trump valdi á þessu ári rautt þema sem hún kall­ar „American Trea­sures“ eða  fjár­sjóði Banda­ríkj­anna. Hún vís­ar í rauða lit­inn í banda­ríska fán­an­um, hug­rekki Banda­ríkja­manna og vinnu­semi. Það að skreyta Hvíta húsið er stórt verk­efni og þakk­ar hún 225 sjálf­boðaliðum sem lögðu henni lið í þessu verk­efni fal­lega fyr­ir vinn­una sína í hjart­næmri færslu á Twitter.

Að venju er fjöl­miðlum boðið að virða fyr­ir sér jól­in í Hvíta hús­inu fyrst allra. Mel­ania Trump vakti at­hygli þeirra í gær, með því að vera fjar­ver­andi þá frum­sýn­ingu og velja frek­ar að birta mynd­band af jóla­skreyt­ing­un­um og þannig láta verk­in tala sínu máli.

For­setafrú­in klædd­ist svört­um fatnaði í mynd­band­inu og er þemað gjör­ólíkt því sem hún valdi í fyrra. Þar var þemað hvítt, hún klædd hvít­um kjól með dans­andi ball­ett­d­ans­ara í kring­um sig. 

The Washingt­on Post ger­ir fjar­veru for­setafrú­ar­inn­ar að um­tals­efni sínu, sem og drunga­leg­ar jóla­skreyt­ing­ar.

Time ger­ir viðbrögð al­menn­ings að meg­in­viðfangs­efni sínu. Hvernig sum­ir völdu að tengja rauða lit­inn við blóð, dauða og þemað við Hands­maid´s Tale-þáttaröðina. 

For­setafrú­in lagði greini­lega mikið á sig við að gera Hvíta húsið að æv­in­týra­leg­um stað að heim­sækja. Enda má bú­ast við mikl­um fjölda fólks sem sæk­ir hug­mynd­ir í þær skreyt­ing­ar sem finna má í Hvíta hús­inu. Mel­ania Trump er vön því að vinna skipu­lega að því sem hún tek­ur sér fyr­ir hend­ur. Rauður hef­ur löng­um þótt lit­ur jól­anna og sama hvað fólki finnst um rauðu berja­trén á göng­un­um í aust­ur­hluta  bygg­ing­ar­inn­ar. Þá lýsa stór og fal­leg jóla­trén víðs veg­ar um húsið upp skamm­degið og færa birtu og yl til þeirra sem hafa áhuga á að skoða skreyt­ing­arn­ar út frá fleiri sjón­ar­horn­um.