Lofa að breyta hegðun á samfélagsmiðlum

Sextán breskar samfélagsmiðlastjörnur og áhrifavaldar, þar á meðal söngkonurnar Ellie Goulding og Rita Ora, og fyrirsæturnar Rosie-Huntington Whieley og Alexa Chung, hafa sammælst um að skilgreina betur þegar færslur sem þær birta á miðlum sínum eru kostaðar.

Héðan í frá munu þær taka það skýrt fram ef færslan er kostuð eða ef vörur sem koma fyrir í færslunni hafi verið fengnar að gjöf.

Rosie Huntington-Whiteley fékk athugasemd frá breska Samkeppniseftirlitinu vegna duldra auglýsinga á samfélagsmiðlum. AFP

Tilefnið er aðvörun sem stjörnurnar fengu frá Samkeppniseftirliti Bretlands (e. Competition and Markets Authority, CMA) þar sem segir að færslur þeirra gætu brotið í bága við samkeppnislög. 

Talsmaður Samkeppniseftirlitsins segir í samtali við BBC að ekki hafi fengist staðfest hvort lög hafi verið brotin en að áhrifavaldarnir hafi allir tekið vel í að breyta hegðun sinni á samfélagsmiðlum eftir að rannsókn á færslunum lauk. Ef engin breyting verður á geta áhrifavaldarnir hins vegar átt yfir höfði sér málsókn, háar sektir eða jafnvel verið dæmdir til allt að tveggja ára fangelsisvistar.

Hér má sjá tæmandi lista yfir áhrifavalda sem hafa heitið því að breyta hegðun sinni á samfélagsmiðlum, en auk þeirra sem nefndar voru hér að ofan eru leikkonan Michelle Keegan og raunveruleikastjarnan Holly Hagan einnig á listanum. 

• Blogga um frétt